"Kahen puolen puuta"
Sano lapin mies, ko etelän äijä kysy sääskien lukumäärää. Vois sanoa, että niin niitä oli Honkamaassaki rohki runssaasti, ko mettää ja itikoita pölkäämättömät erämiehet ja naiset olit kokkoontuhneet jokavuotisseen riistalaskenthaan. Niinko enenki olhaan sanottu, niin voihaan sanoa nykki, että olhaan Vojakkalan Erässä tämä valtakunnallisestikki erittäin tärkeä velvollisuus hoiettu joka vuosi. Monikhaan ei valitettavasti oikein vieläkhään ymmärä, että mikä merkitys laskennala on nykypäivänä. Soon semmonen homma, että sen perusteela net tehhään, hyät muukki mettämiehet, teilekki toivottavasti tärkeät riistakanta-arviot ja sitä myötä mettästystä koskevat rajotukset, ym.
Riistakolmiolaskenthaan tuli tänä vuona vähän muutoksia sillalaila, että soli vähän aikasemin ko ennen ja aikaakhaan ollu ko muutama päivä tehä, ko mettästysaikaa koskehviin pykähliin haluthiin maholisimman verekset tiot. Tarkottaa sitä, että mettäkanojen määräarviot olis hyälä aikaa ennen jahin alkua. Kyllähän siinä varhmaan tovi menneeki, ko plokkaa useampien satojen riistakolmioitten tiot oorninkhiin, että kyllä net ruunun herrat on senki hunteerahneet. Elokuun kaheksanteheen päihvään mennessä oli jo laskettu 668 kolmiota. Niitähän on koko Suomen aluhheela jotaki 1650:n paikheila ja net nuot herrat pittää, että ko olthiin kuiteski jo 668 laskettu ennen elokuun puoltaväliä, niin siittä jo voithiin räknata riistan määrässä tapahtuneita muutoksia. Voihan sanoa, että met emmä ainakhaan huonoja ole tuossa laskuhommassa ko kuitenkhaan koko valtakunnassakhaan lasketakko rapeat puolet perustettujen kolmioitten määrästä. Tietoa ylhäälä olevista luvuista on saatu tuolta riista- ja kalatalouden tutkimuslaitoksen (RKTL) kotisivuilta: http://www.rktl.fi/riista/pienriista/metsakanalinnut/metsakanalinnut_vuonna_2013/, että ei ole omasta päästä keskittyjä numeroita.Alla olevasta kartasta näkkyy 30.7.2013 tehyn riistakolmiolaskennan tulokset RKTL:n kolmion 1497 osalta.
Kuva 1. RKTL:n riistakolmion (Vojakkalan Erä) 1497 tulokset
Enpä tuosta itte laskentahommasta mithään sen kummempaa halua nytten alkaa selitähmään, muutako, että ilma oli pilvipoutaa ja lämpöä tarpheeksi eli 17 astetta selssiusta. Rätingit tehtiin aikavälilä 18:20 - 21.00 Sepustinpa kuiteski vielä pienen värssyn, joka kuvvaa aika laila meän laskujoukkuheen tuntheita heinäkuun loppupuolen kosteana tiistai-iltana Honkamaassa. Värssyn alla on vielä pari kuvvaa tapahtumasta, että semmosta tällä kertaa.
Riistaa laskemassa (Värssykokoelamasta: "Mettämiehen arkea" ©Veli-Matti Pelimanni, 2013)
Honkamaassa riistaa laskit, sääskien seassa samoilit, ko net jokku, sinun "mettäkaverit", vain koin lämmössä mamoilit. Inisijät net kimphuun kävit, ko risukossa kosteassa rävit. Net kuppas ottaa, kuppas suuta, joku huusi: "Niitä on kahen puolen puuta!" Katoit karttaa, katoit kompassia, kaivoit taskusta tupakkimassia. Savukos se helpottas sääskitraumaa, eipä taia, ko katot itikkalaumaa. Laittaa tossua tossun etheen keino paras taitas olla, mutta liiaan kovasta vauihista, ko laskusta voipii tulla nolla. Puusta sitkeästä taitoit, "koivuniemen herran", tuntea sitä saanut olit kläppinä ainaki kerran. Hyvä risu oliki kätheen tullu, mutta sai sillä kyllä huitoakki ko hullu. Huioit taka, huiot etheen, teki perkules jo mieli hypätä vetheen. Noh, eihän tässä mikhään auta, menhään etheen päin, jumalauta! Antaa pirujen kupata päätä, mutta oottakaapa pakkassäätä. Siittäpä että selviä ja meiläpä on silloin mukava mettässä telmiä.
Talloit maata talloit pajuja, veit henkheen mettän hajuja. Muistelit "kympin" sanoja: "Katelkaa mettäkanoja! Laskekaa ketjussa teeret, pyyt ja metot, talsikaa jänkät, kuusikot ja letot." Ilmojahan se ei ole pielly, mutta sääskiä kaks olet aianaki nielly. Satheen tuhru, nyt soon on hätä, kynäkhään ei jälkeä jätä. Vaikka kuura ei nyt tartu parthaan, huonosti saat jäljen karthaan. Koitat riimustaa merkin hyvän, no perskutti, katkasit taas kynän. Muistin varhaan jättää et voi mithään, hetkinen, eihän pitänykhään mennä ithään? "Huhuu, missäs kaveri!" Ko nyt sattunu ei olis vain haveri? Mikäs se tässä nytten mättää? Jaha, tuola se onki, ei olekhaan mithään hättää. "Ketju kunthoon keskimies!" Riistaa löytyy kukaties? Löysit metton, löysit teeren, löysit pupujussin, jänkän laiasta mäthään päältä, hylätyn kaljapussin. Matkaa jatkoit, laskit riistaa, jotta kannasta ei tulis kiistaa. Tokumentit, kartat, "kympille" annoit ja vastuun hommasta taasen kannoit.
-nokipannu-
"Kukhaan ei voi tehä kaikkia, mutta jokhainen voipii tehä
jotaki; ja jos jokhainen tekkee jotaki,
tullee kaikki tehyksi."
-joku on joskus tuomosenki lauseparren keksiny-
Kuva 2. "Kympin" ryhmä lähössä sääskien kanssa taipahleeseen (Kuvan ottanut Raimon kamerala: Heikki Heikkilä)
Kuva 3. Siinäpä se, pieni, mutta laadukas joukkue (Kuvan ottanu Raimon kamerala: Meini Nivaoja)
Terveisin-nokipannu, kolmiopäälikön käskystä-
